Hojiin giddugalicha hundeessuu Yunivarsitiin Saayinsii fi Teekinoolojii Adaamaa bulchiinsa Magaalaa Adaamaa wajjiin ta’uun raawwatama.
Qo’annoo fi qorannoo biqiltoota qorichoomaaf oolan giddugalichatti walitti qabamanirratti taasisuun kaayyoo hundeeffama giddugalichaa keessa tokko jedhan yunivarsitii Saayinsii fi Teekinoolojii Adaamaatti daareektarri Inistiitiyuutii Faarmaasiitikaalaa doktar Katamaa Taaffasaa.
Giddugalichi kuus-daataa qorannoos of keessatti kan hammatuu fi iddoo haara galfannaa olaanaa jiraattota magaalattii ta’aas eeran.
Lafa bulchiinsi magaalattii qopheesse heektaara 40rratti giddugala hundaa’uuf yunivarsitichi qarshii miliyoona 60 ka’uumsaaf ramaduus himan doktar Katamaan.
Hoji-gaggeessaa Ittaanaa fi Itti Gaafatamaan damee tajaajila mana qopheessaa bulchiinsa magaalaa Adaamaa obboo Kokkab Akliluu gama isaaniitiin giddugalli hundeeffamu kun magaalattiif faayidaa hawaas diinagdee olaanaa qaba jedhu.
Madaala qilleensaa magaalattii eeguu bira darbee jiraattotaaf iddoo haara galfannaa ta’uu akkasumas hawwattummaasaan daawwattoota gara biroo fiduun galii maddisiisuu danda’aa jedhan.
Milkaa’ina piroojaktichaafis yunivarsitii Saayinsii fi Teekinoolojii Adaamaa faana qindoominaan hojjatamaa akka jiru dubbatan.
Jamaal Kadiiritu Gabaase.
