Adaamaa investimanti giruuppiin killeefi aannan gatii madaalawaan dhiheessuu erga eegalee fayyadamaa taaneerra jedhan hojjettootni mootummaa fi jiraattonni magaalaa Adaamaa tokko tokko.

ABS dhiyeessin Aannanii fi Killee AIG sadarkaa maaliirra akka jiru ilaaleera.

Hawaasnii fi jiraattonni magaalicha tokko tokko yaadaa ABS’f kennaniin Aannan liitirri tokko gabaa idileetti qarshii 80-90 ta’uu himanii AIGtti garuu qarshii 60 ta’uu dubbatu.
Killeen tokko gabaa idileetti qarshii 13-15 yoo ta’uu asitti ammoo qarshii 10 ta’uu himan.

Garaagarummaa gatii qofaa osoo hin taanee dhiyeessi irratti garaagarummaa guddaan jiraachuu kan himan hawaasni kun bakkeerratti Aannan yeroo gurguran bishaan itti maku waan ta’eef AIGtii garuu Aannan qulqulluu arganna jedhan.

Hojjettootni achi keessaa isaan keessummeessan haalaa gaariin keessummeessaa jiraachuu himanii bakki dhiyeessiin kun jiru garuu bal’ina magaalichaan waan wal hin simneef babal’ina isaa irratti hojjetamuu qaba jedhan.

Adaamaa Investiment Grouptti hoji gaggeessaan damee misooma beelladaa Obbo Abbitoo Lammaa dhaabbanni AIG interpiraayizoota sadii of jalaa qabu keessaa Interpiraayiziin qonnaa tokko ta’uu himanii interpiraayizii qonnaa kanaanis hojiileen hojjetamaa jiraan hedduu ta’uu dubbatu.

Kunis horsiisa Lukkuu,Loon Aannanii,furdisa Loonii yoo ta’u horii 674 jiran keessaa 250 dhalanii elmamaa jiraachuu himanii kanaanis guyyaatti Aannan liitira 2700 ol omishaa jiraachuu himan.

Qala’insa jireenyaa yeroo amma mudachaa jiru dhabamsiisuuf qulqullinaa,ariitii fi baay’inaan hojechaa jiraachuus dubbatu.

Gaaffii hawaasni kaaseen wal qabatee deebii kan kennan Obbo Abbitoon giddu galli gabaa bakka sadii jiraachuu himanii ammas caalaatti babal’isuuf kutaalee magaalaa jahan keessatti hundeessuuf hojechaa jiraachuu dubbatu.
Gabaasni kan Yordaanos Mokonnin.