Barattoonni fi hojjettonni Yunivarsitii saayinsii fi teeknolojii Adaamaa guyyaa dubartootaa idi addunyaa “march 8” kabajan.

Guyyaan dubartootaa “march 8” akka adduunyaatti yeroo 114ffaaf  akka Itiyoophiyaatti yeroo 49ffaaf kabajamaa jira.

Ittii gaafatamtuun dhimma dubartootaa fi hawaasummaa yunivarsitii saayinsii fi teeknolojii Adaamaa Aadde Sawunnat Booraa kaayyoon kabaja guyyichaa walqixxummaa dubartootaa mirkaneessuf hojiilee akka yunivarsitichaatti hojjatamaa jiran yaadachisuu fi  itti fufiinsa isaa irratti qaamoleen hunduu tumsa akka taasisaniif kaka’umsa uumuuf ta’uu dubbatan.

Pirezadaantiin yunivarsitii saayinsii fi teeknolojii Adaamaa Dr Lammii Guutaa yunivarsitiichi fayyadammummaa fi hirmaannaa dubartootaa cimsuuf tarsiimoo garagaraa bocuun hojiilee bal’aa hojjachaa jiraa jedhan.

Saganticharratti argamuun ergaa kan dabarsan itti gaafatamtuun waajjira dhimma dubartootaa fi daa’immanii magaalaa Adaamaa Aadde Ra’isaa Juneeydii dubartoonni biyya ijaaruu keessatti shoorri isaanii ol-aanaa ta’uu hubatanii guddina fi jijjiirama qabatamaa fiduuf gahee irraa eegamu bahachuu akka qaban dhaamaniiru.

Dubartoonni kabaja guyyichaarratti hirmaatan tokko tokko yaada ABS’f kennaniin guyyichi kabajamuun isaa  xiyyeeffannoon dubartootaaf kenname ol-aanaa ta’uu nu hubachisaa  kunimmoo kaayyoo keenya irratti ciichinee akka hojjennu kaka’umsa nutti hora jedhan.

Xumura irratti barattoota dubartootaa qabxii ol-aanaa galmeessaniif badhaasni kennameera.

Makkiyaa muussaatiin