Manni murtii Aanaa Kutaa Magaalaa Abbaa Gadaa Miseensota raayyaa ittisa Biyyaa qabeenyaa nama dhuunfaa qarshii kuma dhibba 2 fi Kuma 46 ol mancaasan hidhaa cimaa waggaa 1 fi qarshii 1000’n adabe.

Himatamtonni Kun waliin ta’uudhaan qabeenyaa nama dhuunfaa irratti miidha qaqqabsiisuuf yaadanii gaafa guyyaa 4-5-2017 halkan keessaa sa’aati 6:00 yeroo ta’uu Kutaa Magaalaa Abbaa Gadaa Aanaa Buttaa mana ragadaa national jedhamU seenuun himatamaa 1ffaan Abinet Alamuu fi himatamaa  2ffaan, Hashim Jamaal  miseensa raayyaa ittisa Biyyaa yoo ta’an himatamaa 3ffaan maqaan isaa Jibril Hajii jedhamuu immoo miseensa raayyaa ittisa Biyyaa osoo hinta’in uffata raayyaa ittisa Biyyaa uffatee miseensota raayyaa ittisa Biyyaa waliin dhuvanii macha’uun  fayyadamtoota mana Dhugaatichaa Jiran miidhuun qabeenyaa mana dhugaatichaa tilmaama qarshii Kuma 200 fi kuma 46  ol ta’u caccabsuun miidha waan qaqqaabsisaaniif eeruu hawaasaatiin battaluma sanatti to’annoo seeraa jala oolaniiru.

Galmeen qorannoo isaanii Abbaan alaangaa Kutaa Magaalaa Abbaa Gadaa fi qorattoonni Waajjira poolisii Aanaa Buttaa qorannoo irratti gaggeessuun Abbaan alaangaa Kutaa Magaalaa Abbaa Gadaa himatamtoota hundaa irratti himannaa seera yakkaa keeyyata 32/1A fi 690/1B fi himatamaa 3ffaa ituu raayyaa ittisa Biyyaa hinta’in uffata raayyaa ittisa Biyyaa uffate irratti seera yakkaa keyyata 330 jalatti himannaa  banee mana murtii aanaa kutaa magaalichaaf erga.

Haaluma kanaan  himatamtonni ragaa ittisa waan hinqabneef Manni murtii aanaa Kutaa Magaalaa Abbaa Gadaa dhaddacha yakkaa gaafa guyyaa 26-6-2017 ooleen lakkoofsa galmee 02941 ta’e ragaa bitaa fi mirgaan irratti mirkanaa’een himatamtoota hunda irratti hidhaa cimaa waggaa 1 fi qarshii 1000’n akka adabaman murteesseera.

Amaanu’eel Daggafaa.