Waajjirrii carraa hojii uumuu fi oogummaa magaalaa Adaamaa baankii siinqee damee Adaamaa waliin ta’uun haala bulchiinsa faayinaansii hoogganuun danda’amu irratti waldaalee IMX fi intarpiraayzootaaf leenjii kennee.

Ittii gaafatamaan waajjira carraa hojii uumuu fi oogummaa magaalaa Adaamaa obbo Abdulqaadir Xayyibuu akka jedhanitti sochii fi sirna bulchiinsa faayinaansii mirkaneessuun guddina biyya tokkoof murteessaa ta’uu kaasanii kaayyoon leenjichaas qabiinsa faayinaansii irratti hubannoo cimsuuf akka ta’e himan.

Baankii siinqee damee Adaamaatti hoogganaan liiqii Obbo Ismaa’il Kadiiroo baankichi waldaalee hedduuf tajaajila liiqii fi qusannaa mijeesse kennaa jiraachuu himanii waldaaleen waan hojjetan adda baafachuun galii fi baasii walsimsiisuun milkaa’ina barbaadamerra gahuuf xiyyeeffannoon hojjachuutu irraa eegamaa jedhan.

Saganticharratti argamuun kallattii hojii fuulduraa kan kennan Kantibaan bulchiinsa magaalaa Adaamaa obbo Hayiluu Jaldee akka magaalichaatti rakkoo hoji-dhabdummaa hundeerraa furuuf dargaggoota gurmeessuun carraan hojii bal’aa uumamee jira jedhan.

Fedhii hojii fi maallaqa qabaachuun qofti gahaa miti kan jedhan obbo Hayiluun waldaaleen seeraa fi karooraan hoogganamuun galma gahiinsa hojichaaf kutannoon hojjechuu akka qaban dhaamaniiru.

Hirmaattonni leenjichaa tokko tokko yaada kennaniin leenjicharraa hubannoo gaarii argachuu himanii carraa mootummaan mijeessetti fayyadamuun ofii fi biyyaas jijjiruuf kutannoon ni hojjanna jedhan .

Makkiyaa Muussaatiin